Cooperativas de Galicia

A produción sostible é aquela capaz de abastecer as necesidades alimentarias do presente sen poñer en perigo o abastecemento de alimentos para as xeracións futuras. A súa aplicación pretende substituír o modelo agrario productivista, pouco preocupado polas esixencias de protección do medio ambiente, por outro modelo no que os obxectivos sexan a produción agraria a longo prazo e no que o respecto polo contorno se considere un factor tan importante como a terra, o capital ou o traballo.

A incidencia de pragas e enfermidades nos cultivos levou a un abuso dos medios químicos para loitar contra estes males, motivando en determinados casos a aparición de residuos nos produtos agrícolas e múltiples danos ambientais. A limitación no uso de fitosanitarios (e de zoosanitarios, no caso da gandería) e unha das prioridades na produción sostible.

O sistema para levar á práctica estes obxectivos da produción sostible son as producións integrada e ecolóxica, que perseguen a preservación do medio ambiente e da natureza como fonte de recursos garantindo o abastecemento dos mercados e o mantemento dun nivel de prezos xusto para os consumidores e rendible para os produtores.

Aínda que todo o contorno se beneficia da aplicación deste sistema produtivo, o máximo beneficiario é o propio ser humano, que deste xeito ten a posibilidade de acceder a alimentos seguros, saudables e de calidade, e que recuperan as cualidades organolépticas e de sabor dos produtos tradicionais.